काठमाडौं । शुक्रबार एक दिनका लागि मात्रै नेपालबाट ४० मेगावाट बिजुली बंगलादेश निर्यात हुने भएको छ । भोली मध्याह्न १२ः४५ मा नेपालबाट भारतीय प्रसारणलाइन हुँदै बंगलादेशमा विद्युत पुर्याउन लागिएको हो ।
यसअघि गएको असोज १७ गते काठमाडौंमा नेपाल, भारत र बंगलादेशबीच विद्युत व्यापारसम्बन्धि भएको त्रिपक्षीय सम्झौता अनुसार शुक्रबार नेपाल, भारत र बंगलादेशका ऊर्जामन्त्रीले भर्चुअल उद्घाटन गरी विद्युत निर्यात सुरु हुने भएको हो ।
प्राधिकरणले २५ मेगावाट क्षमताको त्रिशूली र २२ मेगावाट क्षमताको चिलिमे जलविद्युत् आयोजनाको बिजुली बंगलादेश निर्यात गर्नेछ।
मुजफ्फरपुरदेखि भारतको प्रसारणलाइनमार्फत बेहरामपुर–भेडामारा ४०० केभी प्रसारणलाइनबाट बिजुली बंगलादेश पुग्नेछ। विद्युत् प्राधिकरणका अनुसार ५ वर्षको लागि निर्यात सम्झौता भएको छ।
