काठमाडौं । सरकारले बन्द अवस्थामा रहेको हेटौंडा कपडा उद्योगलाई पुनः संचालन गर्ने भएको छ । उक्त उद्योग संचालनको लागि उद्योग मन्त्रालयले एक अध्ययन समिति गठन गरेको छ ।

मन्त्रालयले उद्योगको बस्तुस्थिती अध्ययनका लागि राष्ट्रिय योजना आयोगका पूर्व सदस्य डा. पुष्कर बज्राचार्यको संयोजकत्वमा ८ सदस्यीय समितिको गठन गरेको छ । सो कमिटिलाई १५ दिनभित्र सुझाव सहितको प्रतिवेदन पेश गर्न निर्देशन दिएको छ । समितिले उद्योग पुनः संचालनका लागि उपयुक्त मोडालिटी, प्रकृया, मेशिन र पूर्वाधारको अवस्था, उद्योगमा हुन सक्ने लगानीका विकल्पहरु र उद्योगबाट हुने उत्पादनको लागि बजारको सम्भाव्यता समेत सरकारलाई शिफारिस गर्ने छ ।

सो समितिमा अर्थ मन्त्रालयका सह सचिव हरिशरण पुडासैनी, उद्योग मन्त्रालयका सह सचिव यमलाल भुषाल, नेपाली सेनाको प्रतिनिधि, नेपाल प्रहरीको प्रतिनिधि, सशस्त्र प्रहरीको प्रतिनिधि एवं निजी क्षेत्रबाट रामएकबल यादव, अजय मुडबरी र विना गौतम श्रेष्ठ रहेका छन् ।

नेपाल सरकारको पूर्ण स्वामित्वमा रहेको हेटौंडा कपडा उद्योग २०५७ साल देखि बन्द रहेकोछ । २०३५÷३६ देखि व्यवसायिक रुपमा उत्पादन शुरु गरेको यस उद्योगको दैनिक ३६ हजार मिटर कपडा उत्पादन गर्न सक्ने क्षमता छ ।