काठमाडौं । नेपालमा पहिलो पटक प्राईभेट इक्विटी एण्ड भेन्चर क्यापिटल (पीईभीसी)ले लगानी सुरु गरेको छ । उद्यमी राजेन्द्र खेतानलगायतको लगानी रहेको ग्लोवल इक्विटी फण्डले नेपालमै पहिलो पटक आधिकारीक रुपमा लगानी गर्न सम्झौता गरेको हो ।
ग्लोवल इक्विटी फण्डले साढे १० मेगावाटको भृकुटी ग्रीड–टाईड सोलार प्रोजेक्टमा लगानी गर्न आशय पत्रमा हस्ताक्षर गरेको हो । फस्ट सोलार डेभलपरले आगाडि बढाएको सो परियोजनामा लगानी गर्न फस्ट सोलारका प्रमुख कार्यकारी अधिकृत एवं प्रबन्ध निर्देशक राजकुमार थापा र ग्लोबल इक्विटी फण्डका कार्यकारी निर्देशक डा. मनिष थापाले हस्ताक्षर गरेका हुन् । साथै नेपालमै पहिलो पटक पीईभीसीको रुपमा परियोजनामा लगानी गर्न आफुहरुले आशय पत्रमा हस्ताक्षर गरेको समेत थापाले जानकारी दिए ।
सम्झौता अनुसार उक्त परियोजनाको ग्लोबलले ३० प्रतिशत इक्विटी लगानी गर्ने समेत थापाले जानकारी दिए । हाल फस्ट सोलारले एसियाली विकास बैंक अन्तरगको भाएविलिटी ग्याप फण्डिङ (भीजीएफ) अन्तरगत बुद्ध भुमी नगरपालिकामा ८० करोड रुपैयाँ लागतमा उक्त आयोजना निर्माण गर्दै छ । सो आयोजनाको निर्माण गर्ने उक्त कम्पनीको चुक्ता पूँजी २८ करोड रुपैयाँ रहेको छ ।
केही समयअघि मात्रै नेपाल धितोपत्र बोर्डबाट स्थापनाका लागि अनुमति पाएको ग्लोबल इक्विटी फण्डले संचालन अनुमति भने पाएको छैन । बोर्डले विभिन्न ५ ओटा कम्पनीको अध्ययन गरेर पूर्वाधार तयार गर्न अनुमति दिएको थियो । सोही अनुरुप केही दिनभित्रै ग्लोबल इक्विटीलाई संचालन अनुमति दिईने बोर्ड स्रोतले जानकारी दिएको छ ।
