काठमाडौं । नेपाल राष्ट्र बैंकले कर्मचारी सुरक्षण कोषमा रहेको २० करोड रुपैयाँ बैंक तथा वित्तीय संस्थाहरुमा ब्याजमा लगानी गर्ने भएको छ। बैंकले फागुन २३ गते (शुक्रबार) एक सूचना जारी गर्दै ‘क’, ‘ख’ र ‘ग’ वर्गका बैंक तथा वित्तीय संस्थाहरूसँग ब्याजदर प्रस्ताव माग गरेको छ।
राष्ट्र बैंकले ‘क’ वर्गका वाणिज्य बैंकमा १६ करोड रुपैयाँ, ‘ख’ वर्गका राष्ट्रिय स्तरका विकास बैंकमा ३ करोड रुपैयाँ, र ‘ग’ वर्गका राष्ट्रिय स्तरका वित्त कम्पनीमा १ करोड रुपैयाँ मुद्दती निक्षेपका रूपमा लगानी गर्न लागेको जनाएको छ।
यस निक्षेपको अवधि २०८१ चैत ३ गतेदेखि २०८२ चैत ३ गतेसम्म ३६६ दिनको हुनेछ। इच्छुक बैंक तथा वित्तीय संस्थाहरूले फागुन २६ गतेसम्म ब्याजदर प्रस्ताव पेश गर्न सक्नेछन्। बैंकका अनुसार, निक्षेप लिनका लागि बैंक तथा वित्तीय संस्थाले कम्तीमा २ वर्ष सञ्चालनमा आएको हुनुपर्ने तथा तोकिएको न्यूनतम पुँजीकोष कायम राखेको हुनुपर्नेछ।
राष्ट्र बैंकले निष्कृय कर्जा ९एनपीएल० कुल कर्जा सापटीको ८ प्रतिशत र खुद निष्कृय कर्जा ९नेट एनपीएल० ३ प्रतिशत ननाघेको हुनुपर्ने जनाएको छ। यसअघि, राष्ट्र बैंक र अन्य सरकारी संस्थाहरूको निक्षेप स्वीकार गर्नका लागि ५ प्रतिशतभन्दा कम एनपीएल हुनुपर्ने व्यवस्था थियो।
त्यस्तै, बैंकले निर्धारण गरेको खुद तरल सम्पत्ति अनुपात कायम राख्ने वित्तीय संस्थाहरूमा मात्र लगानी गरिने राष्ट्र बैंकले जनाएको छ।
