काठमाडौं । नेपालमा भित्रने खुद प्रत्यक्ष वैदेशिक लगानीमा गिरावट आएको छ । कोरोनाका कारण विश्वव्यापी अर्थतन्त्रमा असर पर्दा नेपाल भित्रने खुद वैदेशिक लगानीमा समेत ३१ दशमलव ५ प्रतिशतले गिरावट आएको हो ।

नेपाल राष्ट्र बैंकको तथ्याङ्क अनुसार चालू आर्थिक बर्ष २०७७÷७८ को पहिलो ५ महिनामा ४ अर्ब ५० करोड रुपैयाँ मात्र वैदेशिक लगानी भित्रिएको छ । जबकि गत आबको सोही अबधिमा खुद प्रत्यक्ष वैदेशिक लगानी ६ अर्ब ५७ करोड रुपैयाँ भित्रिएको थियो ।

तर सो अबधिमा विदेशी मुद्रा संचिती भने बढेको छ । कोरोनाका कारण नेपालले गर्ने आयातमा गिरावट आएसँगै विदेशी मुद्रा संचिती बढ्दै गएको तथ्याङ्कले देखाएको छ । २०७७ असार मसान्तमा कुल विदेशी मुद्रा संचिती १४ खर्ब १ अर्ब ८४ करोड रुपैयाँ रहेकोमा मंसिरसम्म आईपुग्दा ५ दशमलव २ प्रतिशतले वृद्धि भई १४ खर्ब ७४ अर्ब ३४ करोड रुपैयँ पुगेको छ ।

कुल विदेशी विनिमय सञ्चितिमध्ये नेपाल राष्ट्र बैंकमा रहेको सञ्चिति १२ खर्ब ९८ अर्ब ७२ करोड रुपैयाँ छ । यसैगरी बैंक तथा वित्तीय संस्थाहरुमा १ अर्ब ७५ अर्ब ६२ करोड रुपैयाँ कायम भएको छ । कुल विदेशी विनिमय सञ्चितिमा भारतीय मुद्राको अंश २३ दशमलव ९ प्रतिशत रहेको छ ।