काठमाडौं । नेपाल राष्ट्र बैंकले सेयर धितो कर्जा (मार्जिन लेण्डिङ) को सीमा घटाउने भएको छ । पछिल्लो समय बैंकले सेयर कर्जामा जथाभावी रुपमा कर्जा प्रदान गर्न थालेपछि राष्ट्र बैंकले मौद्रिक नीतिको त्रैमासिक समिक्षामार्फ सेयर कर्जाको सीमा घटाउने निर्णय गरेको हो ।
राष्ट्र बैंकले व्यक्तिगत अधिविकर्ष कर्जा, सेयर धितो कर्जा तथा रियलस्टेट कर्जा सम्बन्धी विद्यमान व्यवस्थामा पुनरावलोकन गरिने उल्लेख गरेको छ । यी तिनै क्षेत्रमा प्रबाह गरिएको कर्जाको सहि सदुपयोग नभएको र त्यसले वित्तीय अवस्थामै खलल ल्याउन सक्ने भन्दै राष्ट्र बैंकले त्यसमा कडाई गर्ने निर्णय गरेको हो ।
हाल बैंक वित्तीय क्षेत्रको धेरैजसो कर्जा मार्जिन लेण्डिङमा प्रबाह भएको देखिएको र त्यसले आगामी दिनमा लगानीकर्ता फस्नुका साथै बजार घट्दा बैंकहरुनै जोमिमा पर्ने सम्भावना उच्च रहेकाले त्यसलाई कडाई गर्न लागिएको राष्ट्र बैंकका प्रवक्ता डा. गुणकर भट्टले जानकारी दिए । तर यस विषयमा के कति घटाउने वा कडाई गर्ने भन्ने विषयमा नियमन विभागले अध्ययन गरेर केही दिनभित्रै सर्कुलर जारी गर्ने समेत उनले जानकारी दिए ।
साथै राष्ट्र बैंक स्रोतका अनुसार मार्जिन लेण्डिङमा ३ तरिकाबाट कडाई गरिने भएको छ । सेयर धितो कर्जा प्रबाहलाई कम गर्न मार्जिन लेण्डिङको यस अघिको ७० प्रतिशतको सीमा घटाईने भएको छ । यसैगरी राष्ट्र बैंकले यस अघि बैंकहरुले कोर क्यापिटलको २५ प्रतिशतको सीमालाई बढाएर ४० प्रतिशतसम्म सेयर धितो कर्जामा लगानी गर्न मिल्ने व्यवस्था गरेको थियो । तर अबका दिनमा त्यसलाई समेत घटाईने भएको छ ।
यसुैगरी राष्ट्र बैंकले चालू आर्थिक बर्षको मौद्रिक नीतिमार्फत सेयर धितो दिदा १८० दिनको मुल्य गणना अनुपातलाई घटाएर १२० दिनमा झारेको थियो । तर अबका दिनमा त्यसलाई समेत पुरानै अवस्थामा ल्याउने तयारी गरिएको उक्त स्रोतको भनाई छ ।
