बिजखबर संवाददाता
२७ माघ,काठमाडौं । हिमालयन बैङक लिमिटेडले मलेसियाको, मेदान पासार, क्वालालम्पुरमा सम्पर्क कार्यालय स्थापना गरेको छ । मंगलवार एक कार्यक्रमबीच बैङकका अध्यक्ष मनोजबहादुर श्रेष्ठले सो सम्पर्क कार्यालयको उद्घाटन गरे ।
सो अवसरमा उनले सम्पर्क कार्यालय स्थापनाले नियमित विप्रेषण सेवमा सहज हुने बताए । साथै उनले दुई देशबीचको व्यापार विकासमा पनि सहयोग पुग्ने बताए । श्रेष्ठले पर्यटन, व्यापार,बित्तिय सेवालगायत दुई देशबीच लगानीका सम्भाव्य क्षेत्रहरुको प्रवद्र्धनमा सहयोग पुग्ने आशा व्यक्त गरे ।
त्यस्तै बैङकका प्रमुख कार्यकारी अधिकृत अशोक समशेर जबराले सम्पर्क कार्यालयको स्थापना दुई देशबीचको व्यावसायिक तथा सामाजिक सम्बन्ध अभिबृद्धिमा कोशेढुंगो सावित हुने बताए ।
बैङकले सन २००३ देखि मलेसियामा रोजगारीका लागि गएका नेपालीहरुका लागि
हिमाल रेमिट मार्फत विप्रेषण सेवा उपलब्ध गराउदै आएको छ । मलेसियामा रहेका नेपालीहरुलाई सहज विप्रेषण सेवा उपलब्ध गराउन हाल बैङकको करीव १४ ओटा स्थानीय विप्रेषण कम्पनीसँग साझेदारी व्यवस्था रहेको छ ।
यस सम्पर्क कार्यालयले मलेसियास्थित नेपालीहरुबीच बैङक तथा बैङकको रेमिट सेवाको प्रबद्र्धन गर्ने बताइएको छ ।
कार्यालयको उद्घाटन समारोहमा मलेसियाका लागि नेपाली राजदूत डा. निरञ्जन मान सिंह बस्न्यात, मलेसियास्थित नेपाली व्यापारीहरु, बैङकका साझेदार विप्रेषण कम्पनीका पदाधिकारीलगायतको उपस्थिती रहेको थियो ।
