काठमाडौं । एनआईसी एशिया बैंकले बाजुराको सदरमुकाम मार्तडीमा पहिलो शाखा खोलेको छ । बैंकले युके एडको एक्सेस टु फाइनान्स सक्षमसँगको सहकार्यमा उक्त शाखा संचालनमा ल्याएको हो ।
राष्ट्र बैंकका कार्यकारी निर्देशक नारायण पौडेलको आतिथ्यतामा बैंक र सक्षमबीच शाखा संचालन सम्वन्धी सम्झौंतामा बुधवार हस्ताक्षर भएको हो । आइतबारदेखि संचालनमा आएको शाखामा १ करोड ५५ लाख रुपैयाँ निक्षेप संकलन भइसकेको छ भने ३ सय २० वटा निक्षेप खाता खोलिएको छ ।
विकट जिल्लामा निजी लगानीको बैंकले बैंकिङ सेवा पुर्याएकोमा खुशी व्यक्त गर्दै यसले वित्तीय पहुँच विस्तारमा सहयोग पुग्ने राष्ट्र बैंकका कार्यकारी निर्देशक पौडेलले बताए । बैंकले सक्षमको सहयोगमा मार्तडीमा यो शाखासहित थप ३ वटा शाखारहित बैंकिङ सेवा स्थापना भएको छ ।
बैंकले सन् २०२०सम्म ३ सय भन्दा बढी शाखा, १ हजार भन्दा बढी एटीएम र १ हजार भन्दा बढी शाखारहित बैंकिङ सेवा संचालनमा ल्याउने प्रमुख कार्यकारी अधिकृत लक्ष्मण रिसालले बताए । ‘साथी सँगै सक्षम बन्दै’ नाराका साथ अघि बढेको कृषि, लघुउद्यम, कृषि औजार, विपन्न बर्ग कर्जाजस्ता क्षेत्रमा लगानी विस्तार गर्दै आएको उनले जानकारी दिए ।
सक्षमका नेपाल प्रमुख बलजित बोहोराले सक्षमले नेपालको ग्रामिण भेगमा वित्तिय पहुँच पुर्याउन चाहेको जानकारी दिए । ‘यो लक्ष्य हासिल बैंकले हरेक बर्ष नयाँ बैंक वित्तीय संस्थासँग सहकार्य गर्दै आएको छ,’ उनले भने ।
