काठमाडौं । नेपाल राष्ट्र बैंकका गभर्नर डा. चिरञ्जीवी नेपालले नीति निर्माणको क्रममा प्रभावशाली ब्यक्तिको हाबी हुँदा समस्या उत्पन्न भएको बताएका छन् । विशेष गरी बैंक तथा वित्तीय संस्था सम्बन्धी ऐन (बाफिया) ल्याउने क्रममा प्रभावशाली ब्यक्तिहरु हाबी भएको संकेत गर्दै सोचे अनुरुपको ल्याउन नसकिएको उनको गुनासो थियो । ‘नीति नियम बनाउने क्रममा धेरै ठूला प्रभावशाली ब्यक्तिहरुको प्रभाव हुने गरेको छ,’ सेञ्चुरी कमर्सियल बैंकको एकिकृत कारोबार कार्यक्रममा बोल्दै उनले भने, ‘जसको असर नयाँ नीति निर्माणमा पर्ने गरेको छ ।’
यसैगरी बैंक तथा वित्तीय संस्था लेखपढ गर्न नजान्ने ल्याप्चेले चलाउँदा विगतका दिनमा धेरै वटा संस्था समस्यामा परेको उनको गुनासो थियो । ‘पैसाको महत्व बुझ्दैमा बैंकको अध्यक्ष तथा संचालक हुन पाईंदैन,’ उनले भने, ‘यसका लागि जनताबाट संकलन गरेको पैसालाई कसरी सदुपयोग गर्ने भन्ने विषयको ज्ञान हुनु आवश्यक छ ।’ विगतका दिनमा पैसा मात्र भएका ल्याप्चे संचालकले बैंक चलाउँदा समस्या उत्पन्न भएकाले राष्ट्र बैंकले ऐनमार्फत योग्यता तोक्नुपरेको उनको भनाइ थियो ।
हाल बैंक संचालकलाई अभिमुखीकरण तालिम दिनका लागि राष्ट्र बैंकले पाठ्यक्रम तयार पारेकोर र केही समयभित्रै कार्यान्वयनमा आउने उनको तर्क यियो । ‘बैंक संचालक भएपछि कसरी जनताको पैसा सहि रुपमा ब्यवस्थापन गर्ने भन्ने विषयमा बुझ्नुपर्छ,’ उनले भने, ‘त्यसैको लागि राष्ट्र बैंकले संचालक र अध्यक्षलाई तालिम दिन लागेको हो ।’
अहिले पनि बैंक तथा वित्तीय संस्था सुगम क्षेत्रमा मात्र पुगेको भन्दै दुर्गममा पनि जान आग्रह गरेका छन् । अझै पनि ६० प्रतिशत जनता बैंकिङ पहुँचभन्दा बाहिर रहेको भन्दै उनीहरुको पैसालाई पनि बैंकिङ च्यानलमा ल्याउन आग्रह गरेका छन् । साथै संघीय संरचना अनुसार ७ सय ४४ स्थानीय तहमध्ये २ सय ३९ वटमा मात्र बाणिज्य बैंक पुगेको भन्दै अन्य स्थानमा पनि सकभर चाडो शाखा विस्तार गर्न आग्रह गरेका छन् ।
