काठमाडौं । नेपाल राष्ट्र बैंकले विदेशी विनिमय कारोबारलाई व्यवस्थित गर्न नयाँ एकीकृत परिपत्र २०८१ जारी गरेको छ। विदेशी विनिमय व्यवस्थापन विभागमार्फत जारी यो परिपत्रले विदेशी मुद्रा प्रयोग, आयात–निर्यात र लगानीसम्बन्धी नियममा महत्त्वपूर्ण परिवर्तन ल्याएको छ। परिपत्रमा समेटिएका नयाँ प्रावधानले आर्थिक पारदर्शिता र नियमनलाई जोड दिँदै डिजिटल मुद्राको कारोबारमा कडाइ गरेको राष्ट्र बैंकले जानकारी दिएको छ ।
यो परिपत्रले ओमानी रियाललाई परिवर्तनीय विदेशी मुद्राको सूचीमा समावेश गरेको छ, जसले मध्यपूर्वमा कार्यरत नेपाली कामदारलाई सहज हुने अपेक्षा गरिएको छ। साथै, डेनिस क्रोनर बैंक नोटको कानुनी मान्यता सन् २०२४ मे १९ पछि समाप्त हुने भएकाले त्यस्ता नोटहरू २०८१ फागुन मसान्तदेखि २०८४ चैत १३ सम्म सटही गर्न सकिने व्यवस्था गरिएको छ। यो सुविधा नेपाल राष्ट्र बैंकका कार्यालय, इजाजतप्राप्त बैंक तथा वित्तीय संस्था र मनि चेन्जरमार्फत उपलब्ध हुनेछ।
डिजिटल मुद्रा र लगानीमा कडाइका लागि परिपत्रले क्रिप्टोकरेन्सी, भर्चुअल करेन्सी, नन–फन्जिबल टोकन, डिसेन्ट्रलाइज्ड फाइनान्स, नेटवर्क मार्केटिङ र हाइपर फन्डजस्ता कारोबारलाई पूर्ण रूपमा गैरकानुनी घोषणा गरेको छ। यस्ता गतिविधिमा संलग्न व्यक्तिलाई कानुनी कारबाहीको चेतावनी दिइएको छ। त्यस्तै, विदेशमा लगानी गर्न प्रतिबन्ध कायमै राखिएको छ भने स्वाप कारोबारका लागि नयाँ विनियमावली पनि जारी गरिएको छ।
आयातमा पारदर्शिता कायम गर्न निश्चित वस्तुहरू अनिवार्य रूपमा मार्जिन राखी प्रतीतपत्रमार्फत मात्र आयात गर्नुपर्ने नियम लागू गरिएको छ। साथै, केही वस्तुको पैठारीमा पूर्ण बन्देज लगाइएको छ, जसको सूची नेपाल राजपत्रमा प्रकाशित भएको छ। मलेसियाको म्याक्समनी एसडीएन बीएचडीसँगको विशिष्ट कारोबारमा पनि प्रतिबन्ध लगाइएको छ।
