काठमाडौं । नेपाल राष्ट्र बैंकले डिजिटल फाइनान्स इनोभेसन हब स्थापना गरेको छ। बैंकले एक सूचना जारी गर्दै वित्तीय क्षेत्रमा नवप्रवर्तनलाई प्रोत्साहन गर्ने र डिजिटल प्रविधिको माध्यमबाट वित्तीय सेवाहरूलाई थप प्रभावकारी बनाउने उद्देश्यसहित उक्त हब स्थापना गरेको जानकारी दिएको छ ।
केन्द्रिय बैंकको सूचनाअनुसार, यो हबले वित्तीय क्षेत्रमा नवप्रवर्तनकारी विचार र प्रविधिहरूलाई प्रोत्साहन गर्नेछ। यसले स्टार्टअप, प्रविधि कम्पनीहरू, वित्तीय संस्थाहरू, सरकारी निकायहरू र निजी क्षेत्रलाई एकसाथ ल्याएर सहकार्यको वातावरण सिर्जना गर्नेछ। हबले गैर(बाध्यकारी मार्गदर्शन, परामर्श र सूचना प्रदान गर्नुका साथै नवप्रवर्तनलाई प्रोत्साहन गर्न नियामक सहजता पनि उपलब्ध गराउने छ।
नेपाल राष्ट्र बैंकले यो हबले डिजिटल वित्तीय सेवाहरूलाई थप पहुँचयोग्य र सुरक्षित बनाउन महत्त्वपूर्ण भूमिका खेल्ने विश्वास व्यक्त गरेका छन्। यो पहलले नेपालको वित्तीय क्षेत्रमा आधुनिकीकरण र नवप्रवर्तनको नयाँ युगको सुरुवात गर्ने अपेक्षा गरिएको छ।
सूचना २०८१ असोज १२ गते जारी गरिएको हो। थप जानकारीका लागि नेपाल राष्ट्र बैंकको आधिकारिक वेबसाइटमा सम्पर्क गर्न सकिने जनाइएको छ।
