काठमाडौं । लुम्बिनी विकास बैंक लिमिटेडले साहारा फुटबल एकेडेमीलाई दिएको सहयोगलाई यस पटक पनि निरन्तरता दिएको छ । बैंकले उक्त सहयोगलाई निरन्तरता दिँदै एकेडेमीमा आश्रित विद्यार्थीहरूको समुन्नतिको लागि आर्थिक सहयोग स्वरूप २ लाख ४५ हजार रुपैयाँ सहयोग हस्तान्तरण गरेको हो ।
संस्थागत सामाजिक उत्तरदायित्व कार्यक्रम अन्तर्गत विगत लामो समयदेखि आर्थिक सहयोग उपलब्ध गराउँदै आएको पोखरा– १७ दोबिल्लामा सञ्चालित साहारा फुटबल एकेडेमीलाई बैंकले सहयोग पुर्याउँदै आएको छ ।
उक्त सहयोग हस्तान्तरण कार्यक्रममा बैंक सञ्चालक समितिका सदस्य रामचन्द्र सिग्देल र अर्जुन थापाले संयुक्त रूपमा साहारा फुटबल एकेडेमीका अध्यक्ष केशव राज बराललाई सहयोग रकम बराबरको चेक हस्तान्तरण गरे ।
लुम्बिनी विकास बैंकले प्रदान गरेको आर्थिक सहयोगका लागि आभार प्रकट गर्दै साहारा क्लबका अध्यक्ष बरालले सहयोग रकम एकेडेमीमा आश्रित बाल–बालिकाहरूको खाजा र खानाका लागि खर्च गरिने बताए ।
यस लुम्बिनी विकास बैंक लिमिटेडले ‘निरन्तर सहयात्रा’ भन्ने नाराका साथ उच्चस्तरीय, आधुनिक एवं नविनतम प्रविधिहरूसहितको सुरक्षित बैंकिङ्ग सेवा प्रदान गर्दै आइरहेको छ ।
