काठमाडौं । अरुण फाइनान्सको सञ्चालक समितिको अध्यक्षमा अम्बिकाप्रसाद पौडेल चयन भएका छन् । समस्याग्रस्त फाइनान्सलाई मुक्त गराई नयाँ व्यवस्थापनमा संचालन गर्न हिजो बसेको सञ्चालक समितिको वैठकले पौडेललाई सर्वसम्मत रुपमा अध्यक्षमा चयन गरेको हो ।
हाथवे इन्भेष्टमेन्टको प्रमुख लगानी रहेको सो फाइनान्समा नयाँ लगानीकर्ताका रुपमा पौडेल अध्यक्ष सम्हालेका हुन् । फाइनान्सलाई समस्याग्रस्तबाट हटाई राष्ट्र बैंकको निर्देशन अनुसार पूँजी बृद्धि गर्ने मुख्य चुनौतीमा साथ अरुणको जिम्मा सम्हालेको अध्यक्ष पौडेलले बताए । ‘हामीले केही समय अघिमात्र समस्याग्रस्तबाट हटाउन राष्ट्र बैंकमा निवेदन दिएका छौं,’ उनले भने, ‘समयाग्रस्तबाट हटेसँगै पूँजी बृद्धिको योजना अघि बढाउने छौं ।’
अरुण फाइनान्सलाई राष्ट्र बैंकले २०७१ माघ १२ गते समस्याग्रस्त गरेको थियो । अरुण फाइनान्स समस्याग्रस्त हुँदा कम्पनीको चुक्ता पुँजी १५ करोड रुपैयाँ थियो । हाल त्यसलाई बृद्धि गरी झण्डै ३० करोड रुपैयाँ पुर्याइएको पौडेलले जानकारी दिए । कम्पनीले हकप्रद सेयर जारी गर्दै चुक्ता पूँजी पुर्याउने योजना बनाएको छ ।
समस्याग्रस्त अवस्थामा फाइनान्सको निक्षेप १५ करोड ११ लाख र कर्जा १४ करोड १७ लाख रुपैयाँ रहेको थियो । जसको निस्कृय कर्जा नै ८१ प्रतिशत रहेको थियो । आफुहरुको प्रवेशसँगै त्यसलाई उल्लेख्य रुपमा सुधार गरिएको पौडेलले जानकारी दिए ।
