काठमाडौं । नेपाल राष्ट्र बैंकले बैंक तथा वित्तीय संस्थाका लागि एकिकृत निर्देशन जारी गरेको छ । राष्ट्र बैंकले मंगलबार क, ख र ग वर्गका बैंक तथा वित्तीय संस्थालाई एकिकृत निर्देशन २०७९ जारी गरेको हो ।
राष्ट्र बैंकले यसअघि जारी भएका निर्देशनलाई एकिकृत गर्दै उक्त निर्देशन जारी गरेको हो । जस अनुसार कुनै पनि व्यक्तिले राष्ट्र बैंकबाट इजाजतप्राप्त संस्थाहरुको संस्थापक सेयर खरिद गर्न चाहेमा प्रहरी प्रतिवेदनमा अपराधिक पृष्ठभुमि देखिएको व्यक्ति सजाय भुक्तानगरी सफाय पाएको ५ वर्षपछि मात्रै संस्थापक सेयर खरिदगर्न सक्नेछन् ।
यस्तै मार्जिन प्रकृतिको शेयर धितो कर्जाको एकल ग्राहक कर्जा सीमालाई १२ करोडमै सीमित राखेको छ । यस्तो कर्जा प्रवाह गर्ने बैंक तथा वित्तीय संस्थाले कर्जा प्रवाह वा नवीकरण गर्दा उक्त सीमा ननाघेको यकिन गरेर मात्र कर्जा प्रवाह/नवीकरण गर्नु पर्नेछ । तोकिएको सीमा नाघी कर्जा प्रवाह वा नवीकरण गरेमा बैंक तथा वित्तीय संस्थाले उक्त कर्जामा शतप्रतिशत कर्जा नोक्सानी व्यवस्था कायम गर्नु पर्नेछ ।
