काठमाडौं । लगानी बोर्ड र नबिल बैंकबीच पूर्वाधार विकासको लागि रणनीतिक योजनामा सम्झौता भएको छ । बुधवार काठमाडौँमा एक कार्यक्रमकाबीच बोर्ड र बैंकबीच सहमत पत्रमा हस्ताक्षर भएको हो ।
पूर्वाधार विकासको लागि रणनीतिक योजना सहमति पत्रमा लगानी बोर्डका प्रमुख कार्यकारी अधिकृत सुशील भट्ट र नबिल बैंकका प्रमुख कार्यकारी अधिकृत अनिलकेशरी शाहले हस्ताक्षर गरे । उनले पूर्वप्रधानमन्त्री बाबुराम भट्टराईले २०६८ सालमा प्रधानमन्त्री बनेको बेला अर्थात १० वर्ष अगाडि लगानी बोर्ड स्थापना गर्न भिजन बनाए । शाहले लगानीकर्तालाई एउटै ठाउँबाट सबै सेवा दिन योजना बनाएर पनि बोर्ड बस्ने अफिस समेत नपाएको अनुभव सुनाए ।
उनले भने,‘विगत ३७ वर्षदेखि काम गर्दै आएका छौँ । लगानी बोर्डसँग सम्झौता गर्न पाउँदा खुसी छौँ । त्यो दिन जब सम्झन्छु पूर्वप्रधानमन्त्री बाबुराम भट्टराईसँग पहिलो कुरा भएको थियो । के गर्नु पर्ला साह ज्यु भन्नुभएको थियो । मलाई पनि बोर्डमा बस्न आग्रह गर्नुभयो । म बसेँ । त्यो बेलाको दिन सम्झन्छु । पहिलो बैठकमा पूरा मिटिङ अफिस कसरी स्थापना गर्ने भन्नेमा गएको थियो। सबैका विभिन्न आइडियाहरू रहेका थिए । पछि हामीबीच कुरा गर्दा एउटा अफिस स्थापना गर्न यति गाह्रो छ । यो देशमा लगानी कसरी ल्याउँला भन्ने चिन्ता थियो त्यो बेलामा । १० वर्ष भन्दा बढीको अवधिमा बोर्डले जुन किसिमले काम गर्नुभएको छ । त्यसले अहिले अन्तर्राष्ट्रिय स्तरको लगानी बोर्ड रहेको छ । अहिले एउटा लक्ष्य लिएर हिँडेका छौँ लक्ष्यमा हामी पुग्छौँ। पूर्वाधारमा लगानी नबिल बैंकले कुराले नभएर कामले गरेको छ । पूर्वाधार निर्माण गर्न ट्रेडिङ जस्तो आज ल्यायो भोलि बेच्यो पूर्वाधार निर्माण गर्न धैर्यता चाहिन्छ । नेपालमा उत्पादन भएको विद्युत् १०० मेगावाट मात्रै भारतमा बेच्न सक्यौँ भने नेपालको अर्थतन्त्रको मुहार फेरिन्छ । धेरै समय लाग्दैन दक्षिण एसियामा धेरै डलरमा आम्दानी गर्न सक्छौँ ।’
त्यस्तै, लगानी बोर्डका प्रमुख कार्यकारी अधिकृत सुशील भट्टले ठुला पूर्वाधार निर्माण नै देशको आर्थिक सामाजिक विकासको लागि मुख्य फाउन्डेसन भएको बताए । उनले भने, ‘देशको आर्थिक सामाजिक विकासको लागि ठुला पूर्वाधार भनेको एउटा फाउन्डेसन हो । लगानी बोर्डमा कार्यान्वयन तहमा पुगेको ४ वटा परियोजनाहरूको अनुमानित लागत ३ खर्बको रहेको छ । त्यो लगानी रियलाइज हुन्छ । समय भने कुर्नुपर्छ । ठुला पूर्वाधार निर्माण गर्नको लागि विभिन्न चरणहरू पार गर्नुपर्ने हुन्छ ।’
