काठमाडौं । केही समययता बजारमा चरम तरलता अभाव भएपनि बैंकहरुको कर्जा विस्तार भने रोकिएको छैन । नेपाल बैंकर्स संघले जारी गरेको तथ्याङ्क अनुुसार पछिल्लो सयम बैंकिङ प्रणालीबाट निक्षेप बाहिरिने क्रम बढेपनि कर्जा लगानीपनि सोही अनुरुप बढिरहेको छ ।
पछिल्लो एक हप्तामा नेपालका २७ ओटा बाणिज्य बैंकबाट १४ अर्ब रुपैयाँ कर्जा प्रबाह भएको छ ।
साथै सो अबधिमा बैंकिङ प्रणालीबाट ७ अर्ब रुपैयाँ निक्षेप बाहिरिएको छ । बैंकहरुको निक्षेपको मुख्य स्रोतको रुपमा रहँदै आएको रेमिटान्स आप्रबाहमा आएको गिराट, सरकारले पुँजीगत खर्च परिचालन गर्न नसक्दा तरलता अभाव बढ्दै गएको छ भने देशमा उच्च आयात हुँदा कर्जाको माग भने सोही अनुरुप बढेको सम्बद्ध सरोकारवालाहरु बताउँछन् ।
मंसिर ८ गतेसम्म बैंकको निक्षेप ४२ खर्ब २६ अर्बबाट घटेर ४२ खर्ब १९ अर्ब रुपैयाँमा झरेको छ । यसैगरी सोही अबधिमा कर्जा विस्तार भने ४० खर्ब ४१ अर्बबाट बढेर ४० खर्ब ५५ अर्ब रुपैयाँमा पुगेको छ ।
यसैगरी सो अबधिमा समग्र बाणिज्य बैंकहरुको सीडी अनुपात ९० दशमलव ९३ प्रतिशत पुगेको छ । राष्ट्र बैंकले सीडी अनुपात ९० प्रतिशत तोकेपनि बैंकहरुले यस अघिनै उच्च कर्जा विस्तार गर्दा सीडी अनुपात नियामकले तोकेभन्दा बढि हुन पुगेको हो ।
