काठमाडौं । पछिल्लो एक हप्तामा बैंकिङ प्रणालीबाट २० अर्ब रुपैयाँ बाहिरिएको छ । नेपाल बैंकर्स संघले सार्वजनिक गरेको तथ्याङ्क अनुसार असोज मसान्तको तुलनामा कात्तिकको पहिलो हप्तामा बैंकहरुको निक्षेप घटेको हो ।
तथ्याङ्क अनुसार असोज मसान्त सम्ममा बाणिज्य बैंकहरुमा ४२ खर्ब ६९ अर्ब रुपैयाँ निक्षेप रहेको थियो । तर कात्तिक पहिलो हप्तामा आईपुग्दा उक्त निक्षेप घटेर ४२ खर्ब ४९ अर्बमा झरेको छ । असोजको अन्तिम हप्ता कुल १ खर्ब ५१ अर्ब निक्षेप संकलन गरेको बैंकहरुले कात्तिक पहिलो हप्तामा १ खर्ब ३५ अर्ब रुपैयाँमात्र निक्षेप संकलन गरेको तथ्याङ्कले देखाएको छ ।
पछिल्लो समयमा बैंकहरुमा तरलत संकट भएसँगै बैंकहरुको कर्जा विस्तार ठप्प जस्तै भएको छ । बैंकहरुले असोज मसान्तसम्ममा आईपुग्दा ३९ खर्ब ९८ अर्ब रुपैयाँ कर्जा विस्तार गरेकोमा कात्तिकको पहिलोमा पनि हालसम्मको कर्जा प्रबाह ३९ खर्ब ९८ अर्ब रुपैयाँनै रहेको छ ।
हाल वाणिज्य बैंकहरुको कर्जा विस्तार क्षमता एकदमै न्यून रहेको छ । कात्तिकको पहिलो हप्ताको निक्षेप संकलन र कर्जा विस्तारलाई हेर्ने हो भने बैंकहरुको सीडी अनुपात ८९.२२ प्रतिशत रहेको छ । जबकि राष्ट्र बैंकको व्यवस्था अनुसार बैंकहरुले अधिकतम ९० प्रतिशतसम्म मात्र कर्जा प्रबाह गर्न पाउनेछन् । हाल बैंकहरुसँग ४२ खर्ब ४९ अर्ब रुपैयाँ निक्षेप हुँदा ३९ खर्ब ९८ अर्ब रुपैयाँ कर्जा प्रबाह गरिसकेका छन् ।
