काठमाडौं । सिटिजन्स बैंक इन्टरनेशनलले थप ८ स्थानमा शाखा रहित बैंकिङ सेवा संचालनमा ल्याएको छ । बैंकले युकेएडको सहयोगमा संचालित सक्षम–एक्सेस टु फाईनान्स कार्यक्रमको सहकार्यमा भुकम्प अति प्रभावित जिल्लाहरुमा शाखा रहित बैंकिङ सेवा संचालनमा ल्याएको हो ।
बैंकले नुवाकोटमा ६ र दोलखामा २ वटा शाखा संचालनमा ल्याएको हो । जसमध्ये दुईपिपले, बुधसिङ, खानीगाँउ, बागेश्वरी, गनेशथान र थानसीङ गाविसमा शाखा रहित बैंकिङ सेवा संचालन गरेको छ भने दोलखा जिल्लाको सैलुङ र साहारे गाविसमा शाखा रहित बैंकिङ सेवा विस्तार गरेको छ ।
उक्त शाखा रहित बैंकिङ सेवा विस्तार पछि बैंकको सो संख्या ७९ पुगेको छ । शाखा रहित बैंकिङबाट निक्षेप संकलन, रकम भुक्तानी, कोष स्थानान्तरण, मोबाइल फोनको बिल भुक्तानी, उपयोगी सेवा संचालन सेवाको भुक्तानी, लगायत बैंकले प्रदान गर्ने अन्य सेवाहरु उपयोग गर्न सकिने छ ।
