काठमाडौं । सरकारले देशलाई कृषिमा आत्मनिर्भर बनाउने बताईरहँदा नेपालमा आयात हुने चामलको हिस्सा भने दैनिक रुपमा बढेको छ । नेपाल राष्ट्र बैंकले प्रकाशित गरेको बार्षिक तथ्याङ्क अनुसार आर्थिक बर्ष २०७४/७५ मा भारतबाट २८ अर्ब ९० करोड रुपैयाँ बराबरको चामल मात्र आयात भएको छ ।
आर्थिक बर्ष २०७३/७४ को तुलनामा नेपालमा चामल आयात उच्च रुपमा बढेको तथ्याङ्कले देखाएको छ । अघिल्लो आबमा चामल आयात ८ प्रतिशतले बढ्दै २३ अर्ब ६० करोड रुपैयाँको चालम आयात भएको थियो । तर, गत आबमा आईपुग्दा त्यस्तो आयात साढे २२ प्रतिशतले बढ्न पुगेको हो ।
सरकारले देशलाई कृषिमा आत्मनिर्भर बनाईरहने भनिरहँदा नेपालमा चामल, तरकारी तथा फलफुल आयात भने उच्च रुपमा बढ्न गएको तथ्याङ्कले देखाएको छ । पछिल्लो समय नेपालबाट वैदेशिक रोजगारीमा जाने क्रम उच्च रुपमा बढेको र खेतीयोग्य जमिनजति प्लटिङ गरेर राखिएका कारण देशका कृषि उत्पादन घट्दै गएको सम्बद्ध सरोकारवालाहरु बताउँछन् ।
सरकारले बजेट वक्तव्यमार्फत नै देशमा आधुनिक कृषि खेती गर्दै कृषि उत्पादन उच्च रुपमा बढाउने घोषणा गरेको छ । तर, आधुनिक कृषि प्रणालीका लागि आवश्कय मेसिन औजार तथा विउविजन आयातमा भने उच्च गिरावट आएको छ ।
तथ्याङ्क अनुसार आधुनिक कृषि प्रणालीका लागि आवश्यक कृषि औजार तथा विउविजन आयात ७० प्रतिशतले घट्न पुगेको छ । अघिल्लो आबमा आधुनिक कृषि औजार तथा विउविजन आयात ६० प्रतिशतले बढ्दै १५ अर्ब २० करोड रुपैयाँ बराबरको आयात भएकोमा गत आबमा आईपुग्दा ७० प्रतिशतले घटेर ४ अर्ब ५५ करोड रुपौयँ बराबरको मात्र आयात भएको छ ।
आधुनिक कृषि प्रणालीका लागि आवश्यक मेशिन औजार तथा विउविजन आयातमा उच्च गिरावट आउँदा सरकारले तय गरेको लक्ष्य अनुरुप कृषि उत्पादन बढाउन नसकिने समेत सम्बद्ध सरोकारवालाहरु बताउँछन् ।
